14 Decembro 2011, 20:00

  • Cubo de NORMAL
http://istoenormal.org/images/124.jpg

Teatro con perspectiva de xénero: I’LL BE WATCHING YOU (hei estar vixiándote).

Yeni é a vocalista e Dami o guitarrista dunha orquestra de pachanga. Veñen ofrecer o típico repertorio versionaeando os éxitos do pop actual, esa música coñecida por todo o mundo e supostamente neutral, apolítica. Entre tema e tema, Yeni introduce o relato da súa propia experiencia vital como muller,facendo participar ao público dunha nova e crítica lectura dos valores que transmiten as cancións que canta.

ILL’ BE WATCHING YOU e un espectáculo escénico do grupo Chévere. Logo do traballo realizado co proxecto Testosterona sobre identidade e construción de xénero, Chévere segue a desenvolver o seu teatro con perspectiva de xénero poñendo en escena I’LL BE WATCHING YOU (hei estar vixiándote). Trátase dun proxecto pedagóxico, teatral, lúdico e musical que analiza os roles de xénero que transmiten as cancións de temática amorosa da música comercial de consumo masivo.

ILL’ BE WATCHING YOU fala dos valores que moitas veces se agochan detrás das baladas románticas, cuestionando os estereotipos ríxidos de home e muller que non contemplan outras opcións, a cosificación da muller, os celos como proba de amor, a connivencia coa violencia e o sentimento de propiedade sobre a outra persoa. Fala das relacións de igual a igual frente ás que non o son, da autoestima, da necesidade da reacción das propias mulleres para poñer fin á violencia de xénero.

14 de Decembro as 20:00 h. en NORMAL (A Coruña)
20 de Decembro as 20:00 h. Salón de Actos Campus de Esteiro (Ferrol)